वारंवार वीजखंडित होण्याच्या तक्रारींची अधिकाऱ्यांकडे मांडणी; तातडीने उपाययोजनांची मागणी
रुपीनगर (तळवडे), दि. २० सप्टेंबर : प्रभाग क्रमांक १२ मधील रुपीनगर परिसरात वारंवार वीजपुरवठा खंडित होत असल्याने नागरिकांना विविध अडचणींना सामोरे जावे लागत आहे. या समस्येची दखल घेत सामाजिक कार्यकर्ते संदीप भाऊ जाधव यांनी संबंधित विद्युत विभागाच्या अधिकाऱ्यांकडे नागरिकांच्या तक्रारी मांडत वीजपुरवठा सुरळीत करण्यासाठी तातडीने उपाययोजना करण्याची मागणी केली.
यासंदर्भात नितीन महाजन, अतिरिक्त कार्यकारी अभियंता, प्राधिकरण उपविभाग तसेच ऋषिकेश सुदाम बनसोडे, सहाय्यक अभियंता, तळवडे शाखा यांच्याशी संपर्क साधून रुपीनगर परिसरातील वीजपुरवठ्याच्या समस्येबाबत जाधव यांनी पाठपुरावा केला. वारंवार वीजखंडित होण्यामागील तांत्रिक अडचणी दूर करून नागरिकांना सातत्यपूर्ण व सुरळीत वीजपुरवठा उपलब्ध करून द्यावा, अशी मागणी त्यांनी केली.
वीजपुरवठा खंडित होत असल्याने व्यापारी, विद्यार्थी, नोकरदार आणि सर्वसामान्य नागरिकांच्या दैनंदिन कामकाजावर परिणाम होत असल्याचे नागरिकांचे म्हणणे आहे. त्यामुळे केवळ तक्रारींची नोंद न घेता समस्येचे तांत्रिक कारण शोधून त्यावर कायमस्वरूपी उपाययोजना करण्याची आवश्यकता असल्याचे जाधव यांनी अधिकाऱ्यांच्या निदर्शनास आणून दिले.
रुपीनगर परिसरातील वीजपुरवठ्याची समस्या लवकरात लवकर मार्गी लागावी, यासाठी संबंधित विभागाकडे पुढील काळातही सातत्याने पाठपुरावा करण्यात येणार असल्याचे संदीप भाऊ जाधव यांनी सांगितले.
दरम्यान, रुपीनगर परिसरातील वीज, पाणी, रस्ते आणि आरोग्य यांसह विविध मूलभूत सुविधांच्या प्रश्नांसाठी यापूर्वीही आंदोलन, उपोषण आणि जनआंदोलनाच्या माध्यमातून आवाज उठविल्याचे जाधव यांनी नमूद केले.
“नागरिकांचा प्रश्न म्हणजे आमचा प्रश्न आहे. परिसरातील नागरिकांना आवश्यक मूलभूत सुविधा मिळेपर्यंत संबंधित प्रशासनाकडे सातत्याने पाठपुरावा सुरूच ठेवणार,”
…….संदीप भाऊ जाधव. रुपी नगर, पिंपरी चिंचवड.
