सोमेश्वर ज्येष्ठ नागरिक संघात संगीत मैफिलीसह वाढदिवस अभिष्टचिंतन सोहळा उत्साहात
पिंपरी : सोमेश्वर ज्येष्ठ नागरिक संघाच्या वतीने जून महिन्यात वाढदिवस असलेल्या १२४ पुरुष व महिला सभासदांचा सामूहिक वाढदिवस अभिष्टचिंतन सोहळा आणि संगीत गायनाचा कार्यक्रम उत्साहपूर्ण वातावरणात संपन्न झाला. कार्यक्रमाच्या अध्यक्षस्थानी संघाचे अध्यक्ष सुदाम दिवटे होते. प्रमुख पाहुणे म्हणून मानवी हक्क संरक्षण आणि जागृतीचे शहराध्यक्ष अण्णा जोगदंड, पिंपरी-चिंचवड ज्येष्ठ नागरिक महासंघाच्या अध्यक्षा वृषालीताई मरळ तसेच माजी नगरसेवक बाळासाहेब ओव्हाळ उपस्थित होते.
दीपप्रज्वलनाने कार्यक्रमाची सुरुवात झाली. त्यानंतर संघाच्या सभासदांनी सादर केलेल्या सुमधुर संगीत गायनाच्या बहारदार कार्यक्रमाने उपस्थितांची मने जिंकली.
यावेळी बोलताना अण्णा जोगदंड म्हणाले, “ज्येष्ठत्व हा अनुभवाचा दागिना आहे. ज्येष्ठ नागरिक दोन पिढ्या घडविण्याचे महत्त्वपूर्ण कार्य करतात. आपल्या मुलांसह नातवंडांवर संस्कार, नातेसंबंधांचे महत्त्व आणि भारतीय संस्कृतीतील रूढी-परंपरांचे मूल्य ते रुजवितात. त्यांच्या अनुभवाची शिदोरी ही कुटुंबासह संपूर्ण समाजासाठी प्रेरणादायी ठरते.”
माजी नगरसेवक बाळासाहेब ओव्हाळ यांनी ज्येष्ठांना वयाचे बंधन विसरून आनंदी व सक्रिय जीवन जगण्याचा सल्ला दिला. “स्वतःसाठी जगा, आवडत्या गोष्टी करा आणि मन सदैव प्रसन्न ठेवा,” असे आवाहन त्यांनी केले.
ज्येष्ठ नागरिक महासंघाच्या अध्यक्षा वृषालीताई मरळ यांनी महासंघासाठी पिंपरी-चिंचवड महानगरपालिकेकडे तीन कोटी रुपयांच्या निधीची मागणी केल्याची माहिती दिली. तसेच चिंचवड येथे महासंघाची पाच मजली इमारत लवकरच पूर्णत्वास येणार असल्याचे त्यांनी सांगितले.
संघाचे अध्यक्ष सुदाम दिवटे यांनी वर्षभर विविध उपक्रम राबविण्यात येत असल्याची माहिती देत, संघाच्या माध्यमातून सुमारे ४०० ज्येष्ठ नागरिकांना बस प्रवासासाठी सवलतीची कार्डे उपलब्ध करून दिल्याचे सांगितले.
कार्यक्रमादरम्यान वाढदिवस असलेल्या सभासदांचे सौ. राजश्री शेलार, सौ. सुरेखाताई सावंत आणि सौ. भारती कोळेकर यांनी औक्षण केले. त्यानंतर संघाच्या वतीने सर्वांचा सत्कार करण्यात आला. वाढदिवस असलेल्या सभासदांनी केक कापून आनंदोत्सव साजरा केला.
संघाचे उपाध्यक्ष साहेबराव देसले यांनी प्रास्ताविक केले, तर सचिव सुरेश बडगुजर यांनी सूत्रसंचालन केले. कार्यक्रमाच्या यशस्वी आयोजनासाठी खजिनदार प्रकाश सावंत, तुकाराम कोरडे, किशोर गायकवाड, धोंडीराम पाटील, राजेंद्र मोरे, शिवकांत जैस्वाल, रोहिदास पिलाने आणि धनाजी शिंदे यांनी विशेष सहकार्य केले.
यावेळी ज्येष्ठ नागरिक महासंघाच्या अध्यक्षा वृषालीताई मरळ, सोमेश्वर ज्येष्ठ नागरिक संघाचे अध्यक्ष सुदाम दिवटे, मानवी हक्क संरक्षण व जागृतीचे शहराध्यक्ष अण्णा जोगदंड, माजी नगरसेवक बाळासाहेब ओव्हाळ, कार्याध्यक्ष मुरलीधर दळवी यांच्यासह विविध क्षेत्रातील मान्यवर आणि मोठ्या संख्येने ज्येष्ठ नागरिक उपस्थित होते.
